نص كلمة السيسي أمام الدفعة الجديدة من طلبة الكلية الحربية 12/12/2020

السلام عليكم يا فندم،

اسمحولي إن أنا أرحب بالدفعة الجديدة، دفعة طلبة الكليات العسكرية، بأرحب بيكم في الكلية الحربية معقل الرجال وحصن من حصون الدولة المصرية، معقل الرجال، وحصن من حصون الدولة المصرية. وبالمناسبة ديت، أوجه التحية لكل الأسر المصرية اللي أعدت أبناءها وجهزتهم، وقدمتهم هنا، لمصر، عشان يحافظوا عليها، ويحموها من كل شر وسوء.

أنا عارف إن ده الأسبوع الأول ليكم، وكنت حريص إن أنا أكون موجود معاكم من أول يوم، كنت بتابع الإجراءات كلها خلال الأسابيع والشهور اللي فاتت، لغاية لما تم انتخاب أو تم اختياركوا إن شاء الله.

كلكوا زي بعض هنا، وبدايتكم بداية واحدة، مش هاقولك أكتر من اجتهد والتزم واتعلم تتوفق إن شاء الله، وتبقى مثل جيد جدًا، وقدوة عظيمة جدا لنفسك ولزمايلك، وبعد كدة إن شاء الله لما تتخرج.

مش هاوصيكم إن إنتم تحترموا بعض، تحترموا بعض كويس، عمر ماكانت القوة والكفاءة بسوء الخلق، أبدًا، بالعكس، القوة الحقيقية في ضبط النفس وحسن الخلق والتعامل الجيد والكفاءة، كفاءتك كإنسان على أي مستوى إنت موجود فيه، سواء كنت طالب أو ظابط صغير أو ظابط كبير حتى.

مش هاطول عليكم، علشان النهاردة يوم إن شاء الله، يعني هانلتقي بأنشطة كتير، ليكم إن شاء الله، لكن خلال الفترات القادمة بأمر الله سبحانه وتعالى، هايكون ليا معاكوا لقاءات كثيرة، نتكلم وأسمعكم وتسمعوني.

وعايز أقولكم على حاجة، من النهاردة، من أول يوم إنت موجود فيه اتعلم إنك تفكر كويس وتتكلم، بس قبل ما تتكلم لازم تفكر كويس عشان تشوف إن الكلام اللي بتتكلمه ده كلام مظبوط ولا مش مظبوط لكن لازم تتعلم إنك تتكلم وتناقش بعد ما تفكر كويس.

كل سنة وإنتوا طيبين جميعا بمناسبة العام الجديد، وإن شاء الله يبقى عام سعيد علينا كلنا، على مصر، وعلى الدنيا كلها.

السلام عليكم ورحمة الله وبركاته.

ألقيت الكلمة في الكلية الحربية، أمام طلبة الدفعة الجديدة.

خدمة الخطابات الكاملة للسيسي تجدونها في هذا الرابط